انا خاطيني بوليتيك
اي صح انا خاطيني بوليتيك ونكره السياسة بزاف بزاف...بصح السياسة هي اللي تحشر روحها في حياتي...وبانتلي هادي مدة بلي السياسة واجب ....تقولولي كيفاش؟نقلكم انتوما جاوبوني -الخدمة اللي ماكش .... في بالكم علاش... ماشي سوء تسيير الثروات الطبيعية والبشرية في البلاد....وسوء التسيير منين جا...مسؤولين حابسين لايخدمو لا يندبو.....وهادو علاش ماحاوزوهمش وجابو ناس فاهمين؟...على خاطر الوزير...ماشي لاتي...يعني السبب "سياسي" -السكنة لي يمدوها بالمعريفة والقهوة والرشوى....زعما صح ماقدروش يحاربو هاد الشي ويدخلو المرتشين للحبس؟ صح مقدروش علاش....على خاطر المحامي والقاضي رايو ماشي بيدو...وادا ما قدروش يشروه بالدراهم يحاوزوه....على خاطر العدالة ماشي مستقلة وبكلمة من نائب وزير ولا بوكاسكيطة....تخرج البراءة للمتهم ولا تتاجل القضية وتزيد وتزيد وتزيد.....حتى ننساوها"وهاد المشكل هو اساس المشاكل كامل وحلو تلقاوه في السياسة برك" -سنوات الجمر والارهاب.....كيفاش جات ووعلاش...وكيفاش راحت..."سياسة" -الدراهم كي خلاصو وولاو مقطوعين وقبلهم الحليب....ماشي سوء تسيير ....ماشي على خاطر بلادنا ماشية على بركة ربي...."شفتو سياسة تاني" -حتى البالون ومشاكلو...."سياسة" والدليل شوفو اليوم كيفاش خاوتنا المصريين اعتذرو لتونس ودزاير كي دخل الجمهور للستاد...وقبل عام ضربونا وسبونا وزادو سبو حتى الشهداء...وما خلاو حتى واحد عاقل يهدر في فضائية عامة ولا خاصة...حتى قلنا خلاص المصريين كامل على قلب رجل واحد يحقد على كل شي عندو علاقة بينا...علاش هاد الشي؟ انتوما كامل علابالكم بلي السبة" سياسية" ماشي غير هادو برك لوكان تبداو تخممولها تلقاو الف متال ومتال امالا كي ولات هكدا....انا من اليوم ورايح نولي نتبعهم خطوة خطوة قانون قانون...ونقول رايي في كل شي...وانتوما تاني....الديمقراطية لي صرعونا بيها ...تقول بلي الشعب هو اللي يحكم.....بصح قولولي كي ما يتبعش السياسة كيفاش يحكم؟....وكي ما يحكمش ماشي اسمها خيانة لامانة الشهداء اللي حررو البلاد وخلاوهالنا نبنيوها لولادنا....وخيانة حتى لولادنا لي مادرنا والو باش كي يجو للدنيا ما يتمرمدوش كيما تمرمدنا حنا؟ المال السايب يعلم السرقة وحنا خلينالهم كل شي وزدنا غمضنا عينينا وغلقنا ودنينا....ولوكان مانبدلوش هاد الطبيعة نقعدو هكدا ....عايشين على اللي يبقى من دراهم البترول متسرقش....كلي بلادنا مافيهاش غيرو...لا فلاحة لا سياحة لا صناعة لا والو
ليست هناك تعليقات:
إرسال تعليق